(England) 05 Dis 2018. Manchester City ayaa xalay dhigtay Rikoodhkii ugu fiicnaa dhanka Goolasha Premier League muddo 125-sano kaddib.
Kooxda Pep Guardiola ayaa weli la joojin la’yahay kaddib markii xalay 2-1 uga adkaatay naadiga Watford waxayna iminka shan dhibcood oo nadiif ah ka sarreysaa Liverpool oo iyadu caawa ciyaari doonta.
City wax guul darro ah ma arkin 15-kulan ay ciyaartay Premier League kal ciyaareedkan, 13-guul iyo 2-bar baro ah.
Guulaha waxaa u dheer goolasha ay sida roobkii ugu shubeyso kooxaha ka soo horjeeda oo waxay dhaliyeen ilaa iminka 45-gool waxaana laga dhaliyay 7-gool oo qura.
Farqiga goolasha ee 38 ma ahan Rikood ku cusub horyaalka Ingiriiska laakiin waa Rikoodhka goolasha ee ugu fiican 125-kii sano ee ugu dambeysay.
Markaad dib u milcsato 1800 waxaad ogaaneysaa kooxda heysata rikoodhka goolasha ee ugu fiican horyaalka Ingiriiska, xilli ciyaareedkii 1892-93 naadiga Sunderland ayaa heysatay farqi goolasha 39-gool markii ay ciyaartay 15-kulan oo qura.
Gool FM.