(England) 22 Okt 2017. Jose Mourinho ayaa ka jeex jeexay xiddigaha Manchester United isagoona su’aal galiyay hab dhaqankooda ciyaareed kaddib guul daradii lama filaanka ahayd ay shalay kala kulmeen kooxda yar ee Huddersfield Town oo ku martay 2-1.
Red Devils ayaa iminka shan dhibcood sare u fiirineysa kooxda ay ku coltamaan magaalada Manchester ee City.
Ander Herrera ayaa wareysi uu bixiyay ku sheegay inay bilowga ciyaarta si xun u ciyaarayeen isla markaana ay kooxda kale wax kasta kaga fiicnaayeen taa oo Jose jawaab adag ka bixiyay.
“Waxaan maqlay in Herrera uu wareysigiisa ku yiri in hab dhaqankeena ciyaareed iyo rabitaankeena uu dhab ahaan aad u liitay.” Jose ayaa sidaa yiri.
“Oh my God! Marka uu ciyaaryahan yiraahdo in ciyaaryahan sidaa dareemayo, waxay ahayd inay dhammaan wada aadaan shirka jaraa’id ayna sharaxaad ka bixiyaan sababta waayo anigu ma sharxi karo sababta.
Dhanka kale Jose Mourinho ayaa sheegay in kooxdii guusha u qalantay ay guusha qaadatay wuxuuna hadalkiisa ku daray:
“Marka aan guul darreysto kulamada. Waan ka helaa inaan kulamada guul darreysto maxaa yeelay kooxda naga soo horjeeda ayaa naga fiicneyd isla markaana naga tayo badneyd. Marka aad kulan guul darreysato hab dhaqankaaga aawadii, dhabtii aad ayay u xun tahay.
“Dabcan way I walaac galineysaa. Haddii ay maanta dhacday midan maxaysan berina u dhici Karin? Ma xusuusto xitaa kulan saaxiibtinimo uu hab dhaqankeena ciyaarta sidan u liitay.”.
Gool FM.